الاثنين، 1 مارس 2010

مهرجان مجلة رؤيه ..... والمخطوبين الجدد .. وايناس نهر الحب

سلام عليكم

ازيكم ايها المدونين الكرام

اظن انا عداني العيب البوست الى فات رفهت عنكم اهو وشهيصتكم على الاخر ونوتي عملت معاكم احلى واجب تصييح

اه اولا وباديء ذي بديء

مجلة رؤيه عقبال عندكم جميعا بتحتفل بعيدها السنوي

وبقى عندها سنه ما شاء الله

الى جابلك يخليلك يا ابراهيم

وطبعا كان لازما ولا بد نهنى ابراهيم ونصيته فى البلوج عشان

والاحتفاليه الاليكترونيه هاتكون ان شاء الله يوم الجمعه الجايه الساعه 12 بالليل (يعنى اول ما التاريخ يقلب يبقى 6 مارس )

وموقع المجله اهو مـجـلـــة رؤيـــــة

وابراهيم بقى بيقولك فى مفجآت واطلاله جديده وحركات جامده وكده

ودى التفاصيل على الفيس بوك

من هنـــــــــــــــا

وطبعا ابراهيم بما انه قرر يحتل البوست ده تقريبا

بيتوجه بالشكر للدكتوره ستيته والاستاذ تامر علي والدكتور ياسر عمر عبد الفتاح

وابقوا رواحوا بقى زيطوا لابراهيم يا جدعان ما تسبوهوش برضه مش غريب يعنى

انا هاجوزه البت رحمه ايوووووووه باعمل للمستقبل انا طبعا فى مانع ولا ايه

على الله ترجع فى كلامك يا ابراهيم

وثانيا بقى ندخل على التهاني

عشان نقول الف مبروك لمهندس مصري على الخطوبه السعيده وشوفنا صورتك عند فاتيما والف مبروك وعقبال الفرح

وكمان الف مبروك لشيما الشعب لا بد له من حكومه تشكمه حيث انها برضه اتخطبت وهانفرح فيها قريبا ان شاء الله واحتمال بقى لما تتجوز نستريح منها شويه

ههههههههههههههههههه

واحترمي نفسك بقى عايزه اقابلك عشان اباركلك شوفيلك حل

والاغنيه الي شغاله دي اهداء مني للمخطوبين عشان يقدروا يعطفوا ويسنسنوا كويس

وكان فى حاجه مهمه جدا بقالي بوستين عايزه اقولها ومش عارفه بانسى ليه

السن بقى انتم عارفين

المهم

انا من عشر ايام كده يا جماعه لقيت كومنت عندي من ايناس نهر الحب انها جايه المنصوره وعايزه تقابلنى قوم اشرأب عنقي كده وفرحت وتواصلنا انا وهى واتقابلنا فعلا

وطبعا انا باقولكم عشان اغيظكم بس عادي يعنى جت قابلتنى هى واختها وبنت عمتها وبناتها الحقيقه ناس زي العسل

وايناس دي طلعت بجد عسووووله جدا جدا زي ما كنت متوقعها احنا بنتكلم على الاميل بس يعنى

بجد اموره ودمها خفيف ومحترمه جدا ما شا ء الله عليها وكان يوم جميل جدا جدا

وكان معايا العيال وزعناهم على المراجيح وقعدنا ننقي رز لما قلنا بس

خلصنا يجى شوالين الحقيقه

وبعد كل قصه تلاقي واحده فينا بتقول يا رااااااااااجل بقى الحكايه كده اتاري الواحد عبيط مش واخد باله

وهكذااااااااااا

وبالمناسبه هى عامله لقاء فى بورسعيد والتفاصيل عندها من هنــــــا

وطبعا نفسي اروح لها بور سعيد بس اعتقد ان ده صعب بل انه امبوسيبل لظروف الدراسه والبياض وما الى ذلك

ده انا هاتسحل يا لهوووووووووووي

وبس خلاص هاروح امخمخ بوست جديد وارجعلكم

هناك 17 تعليقًا:

ستيتة يقول...

يا أخباراتك يا هولانداااااااااا

بقى مر سنة على رؤية مصرية
سبحان الله والله الأيام بتمر هوا
الف مبروك يا هيما ومن نجاح لنجاح
انا كل ما أدخل المجلة ألاقي تطور اسرع واحسن ونضوج فكري اكتر
ربنا يوفقك
وطالما انت عريس رحمة يبقى كده كويس
يا زين ما اخترت يابني
ده انت واخد حماتك عقل ورجاحة ورمانة ميزان وها تاكل لحد ما تتخن شويتين :)


وانتي بتقولي بننقي الرز قعدت اضحك ضوحك
هههههههههههههههههههههههههه
طب يا هانم مش تديني فكرة عن الرز اللي اتنقى والا اخرج انا من صنف الستات وألتحق بالرجالة؟

سلاموز يا صبصب

همس الاحباب يقول...

الف مليون مبروك للجميع
وبالتوفيق دائما
انا جيت امسى على الماشى
تحياتى

لــــ زهــــــراء ــــولا يقول...

كل مره ادخل هنا بجد بيكون عندى ثقه انى هاقرا حاجه جميله
مش عارفه ليه اشعر بين سطورك برقى فى التعامل مع الناس وده اصبح عمله نادره
المهم انتى مش عاوزه اى مساعده اجى اشيل حاجه علشان تبيضى الشقه براحتك وبعدين انا ساكنه قريب منك اوى اوى انا فى اسكندريه يعنى كلها 5 دقايق ابقى عندك
يبار المدونه كلها افراح واخبار حلوه
تسمحى انى ادعى لك دعوه باحبها جدا ربنا سبحانه وتعالى يعطى لكى على قدر نيتك .....
زهراء

Haytham Alsayes يقول...

مبروووووووووووووووووووووك للجميع وعقبالي يارب
تقبلي تحياتي ومروري
سلام

سواحة يقول...

بوست اونطة عايزين فلوسنا
بوست اونطة عايزين فلوسنا
فين نوتتى
خفيتيها فين
يانوتى تعالى هنا انطرلنا الرز حباية حباية
و قال مش فاضية و بتذاكر و تبيض قال
:-)))))))

اولا حنروح نبارك لمحرر ابراهيم طبعا
المهندس تمت مباركتة بالرفا و البنين
و شيما لقيت ديناصورها يعنى فيه امل السلالة لسه منقرضت جميل
بس
ايه ؟؟
استنى افتكرت
ايه حكاية السن ديه ياستى دردر
لا انا اشرشح يعنى
:-)))
بطلى صنف اللبن الى بتشرابيه الجاموسة ديه بتاكل حشيش مغشوش
و انت تفتكرى على طول :-))))

بوست اونطة عايزين غيره :-)))))

و كان معاكم واندا المشاغبة :-))

فاتيما يقول...

إيه النوظام بقى ؟؟

دى غيوظات كبيرة قوى

طب و الناس الكاهرية
ملهاش كوباية رز سلف ؟؟

نعرف أى حاجة طيب
مش تعلمينا التبيخ و تكسبى ثواب ؟!!


مااااااااااشى

لما اروح لإيناس بورسعيد
هقررها على كل حاجة
و هيا حونينة
وهصعب عليها
قوم تدينى كام رزاية كدا
على ما قسم

حلوة الغنوة ثوى
رقيقة مع انى مبحبش الواد دا
معرفش ليه



كل سنة و رؤية بخير
و انتى بخير
و العيال بخير
و ابوهم بخير
و العرايس و العرسان بخير
يااااارب


و ربنا يكتر الأفراح
و المناسبات
و الحكايات
و ننقعد ننقى رز براحتنا

منتحرمشى من غيوظاتك دى
يا صبصوبتى

صبرني يارب يقول...

سوتيتة حياتي

ازيك يا جميل انتى فين بس وحشاني

هيما اصله جدع انتى عارفه وان شاء الله مستقبله هايبقى كبير اوي

امال انا منشنه عليه ليه للبنت يا خالتي
هههههههههههههههههههه

ميرسي يا جميل على الكلام الحلو والله بتحرجونا يا ناس

والرز والله يا خالتي جت فجأه ايناس كلمتنى قالتلى تقابلينى امته قلتله بكره قالت اوك على طول كده

المره الجايه نقولك يا جميل تيجى تنورينا كمان

منوره دايما يا جميل

صبرني يارب يقول...

همس الاحباب

مساء الهنا يا ابو همس ربنا يخليك

منور والله

صبرني يارب يقول...

زهراء

ميرسي يا جميل ربنا يخليكى

الدعوه جميله اوووووووي يارب يتقبلها منك ومننا

واسكندريه طبعا فكرة كعب
يلا تعالى

هانقعد انا وانتى نرغي ونسيب الشغل
هههههههههههههههههههه
منوره يا جميل

صبرني يارب يقول...

هيثم السايس

ياااااااااااااااااااااارب عقبالك

ونورت

صبرني يارب يقول...

واندا

هاربطك فى رجل الكرسي الى على باب المدونه
هههههههههههههههههههه

نوتي مربوطه فى رجل الكرسي التاني


الرز يا ماما خلاص عبيناه وقفلنا عليه
هههههههههههههههه

تبييض ايه يا ستى بنبيض الشقه مش بنبيض محاضرات
هههههههههههههههههه

وبعدين السن ايوه مش لازم الواحد يعترف
ده انا دماغي بقت فى البلاله والله

والحشيش ياريت يا اختي باتحايل على البت نوتي تدينى شفطه مش راضيه

منوره يا جميل ويارب دايما منوره

والبوست الجديد ما تقلقيش هايجى بس لما نزيط لابراهيم شويه

صبرني يارب يقول...

فاتيما

يا بطوط انت عارف اجبلك شوالين رز واجي قول انت بس
ههههههههههههههههههههه

والغنوه اه عجبتنى مع انى اصلا اصلا ما اعرفش مين ده
هههههههههههههههههههههههههه

ويارب كتر افراحنا فعلا يا جميل

ومنوراني والله

sony2000 يقول...

بقالي كام يوم كدا بسمع والحمد لله اخبار حلوه
يارب كتر افراحنا يارب
والنبي احنا شعب طيب وغلبان
الحمد لله
الافراح كدا بتيجي وقت واحد
يارب دمها علطووووووووووول
تقبلي مروري وتحياتي

جنّي يقول...

السلام عليكم

الف مبروك لابراهيم ومحمد وشيما ..

والمثل بيقول اخطب لبنتك .. ما فيش مانع وبعدين انا كنت ها احجزها لابني .. يلا كل شئ نصيب ..

بالنسبة للقاء بور سعيد احاول ان شاء الله

سلامي وتحيتي

Unknown يقول...

thx

كشف تسربات المياة
غسيل خزانات
شركة نظافة عامة

Unknown يقول...

thank you

سعودي اوتو

mekho matrix يقول...

مشكور على عملك





العاب فلاش